काठमाडौं । इरानले अमेरिकामाथि होर्मुज जलमार्ग क्षेत्रमा दुईवटा जहाजहरूलाई निशाना बनाएको र नागरिक क्षेत्रहरूमा आक्रमण गरेर युद्धविराम उल्लंघन गरेको आरोप लगाएको छ ।
अमेरिकी सेन्ट्रल कमान्डले भने अमेरिकी सेनाले इरानको तर्फबाट भएको उत्तेजक आक्रमणलाई बीचमै रोकेको र आत्मरक्षाका लागि जवाफी कारबाही गरेको जनाएको छ ।
अमेरिकी नौसेनाका गाइडेड–मिसाइल नष्ट गर्ने युद्धपोतहरू होर्मुज जलमार्ग हुँदै ओमानको खाडीतर्फ जाँदै गर्दा यो घटना भएको अलजजिराले जनाएको छ ।
अमेरिकी राष्ट्रपति डोनाल्ड ट्रम्पले इरानी आक्रमणका बावजुद तीनवटा अमेरिकी युद्धपोतहरूले सफलतापूर्वक होर्मुज पार गरेको दाबी गरेका छन् । उनले अमेरिकी जहाजहरूमा कुनै क्षति नपुगे पनि अमेरिकी कारबाहीबाट इरानी सेनालाई ठूलो क्षति भएको बताएका छन् ।
सेन्ट्रल कमान्डले आफूमाथि आएका खतराहरूलाई निस्तेज पारेको र अमेरिकी सेनामाथि आक्रमण गर्न प्रयोग गरिएका इरानी सैन्य पूर्वाधारहरू जसमा विशेष गरी मिसाइल र ड्रोन प्रक्षेपण स्थल, कमान्ड सेन्टर र निगरानी केन्द्रहरूमा आक्रमण गरेको बताएको छ ।
सेन्ट्रल कमान्डले आफूले तनाव बढाउन नचाहेको तर अमेरिकी सेनाको रक्षाका लागि तयारी अवस्थामा रहेको बताएको छ ।
इरानको ‘खातम अल–अम्बिया’ सैन्य मुख्यालयका प्रवक्ताले अमेरिकाले दुईवटा इरानी जहाजहरूलाई निशाना बनाएको आरोप लगाएका छन् । जसमा जास्कबाट होर्मुज जलमार्गतर्फ जाँदै गरेको एउटा तेल ट्यांकर र संयुक्त अरब इमिरेट्सको फुजैराह बन्दरगाहनजिकै रहेको अर्को जहाज रहेका छन् ।
