काठमाडौँ । युक्रेनमा रुसले गरेको नयाँ गोलाबारी र ड्रोन आक्रमणमा पाँच जनाको ज्यान गएको छ। युक्रेनी सेनाले भने रुसको साराटोभ क्षेत्रमा अवस्थित एक ठूलो तेल प्रशोधन केन्द्रमा ड्रोनमार्फत आक्रमण गरी क्षति पुर्याएको दाबी गरेको छ।
युक्रेनी राष्ट्रिय प्रहरीका अनुसार, जापोरिझ्झिया क्षेत्रमा तीन जनाको मृत्यु र एक जना घाइते भएका छन्। पूर्वी डोनेत्स्क क्षेत्रमा थप दुई सर्वसाधारणको ज्यान गएको छ। यसैबीच, कालो सागरस्थित ओडेसा शहरमा प्रतिबन्धित क्षेत्रमा पौडी खेल्ने क्रममा बारुदी सुरुङ विस्फोट हुँदा तीन जनाको मृत्यु भएको छ। उक्त क्षेत्रमा रुसको सम्भावित समुद्री आक्रमण रोक्न सुरुङहरू बिछ्याइएका थिए।
साराटोभका गभर्नर रोमन बुसार्गिनले ‘एक औद्योगिक संरचना क्षतिग्रस्त भएको’ र एक व्यक्तिको मृत्यु भएको पुष्टि गरेका छन्। रुसको बेलगोरोद क्षेत्रमा पनि युक्रेनी आक्रमणका कारण एक महिलाको मृत्यु भएको स्थानीय अधिकारीहरूले जनाएका छन्।
युक्रेनले रुसको तेल तथा ग्यास पूर्वाधारलाई निशाना बनाई युद्धको आर्थिक स्रोत कमजोर पार्ने रणनीति अघि बढाइरहेको छ। सेनाले सुमी क्षेत्रमा पर्ने बेजसालिभ्का गाउँ पुनः आफ्नो नियन्त्रणमा आएको दाबी गरेको छ, जबकि रुसले पछिल्लो समय पूर्वी युक्रेनमा उल्लेखनीय सफलता हासिल गरेको छ।
यसैबीच, युद्ध जारी रहँदा पनि अमेरिकी पूर्वराष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच आगामी शुक्रबार अमेरिकाको अलास्का राज्यमा द्विपक्षीय वार्ता हुने तय भएको छ। तर, युक्रेन र युरोपेली मुलुकहरूले यस्ता वार्तामा युक्रेनलाई समावेश नगरी समाधान खोज्ने प्रयास अनुचित हुने टिप्पणी गरेका छन्।
