जनकपुरधाम । जनकपुरधामस्थित जानकी मन्दिरबाट श्रम संस्कृति पार्टीका कार्यकर्ता लखेटिएका छन् । पार्टी अध्यक्ष हर्कराज साम्पाङ जानकी मन्दिर जाने भएपछि मंगलबार उनको स्वागतमा नेता कार्यकर्ता मन्दिरको गेटमा पुगेका थिए । तर यसअघि साम्पाङले गाई काटेर खान पाउनुपर्ने अभिव्यक्ति दिएको भन्दै हिन्दु सम्राट सेनाका कार्यकर्ताले लखेटेका हुन् । उनीहरूले ‘हर्क साम्पाङ मुर्दावाद’, ‘गो ब्याक’को नारा लगाएका थिए । पार्टी कार्यक्रमका लागि जनकपुर जाँदै गरेका साम्पाङले मन्दिर दर्शन गर्ने तयारी थियो ।
तर हिन्दु सम्राट सेनाका कार्यकर्ताले उनलाई मन्दिरमा निषेध गरेका हुन् । यसैबीच, हर्क साम्पाङले पनि घटनाको पुष्टि गरेका छन् । उनले लेखेका छन्, ‘गाई कसले खाएको रैछ ? गाई खानेलाई मन्दिरमा पस्न नदिने भनेको देखें ! यो कसले कस्तो राजनीति गर्न खोजेको रैछ ? जय जानकी मन्दिर ! । यस्तै उनले गृहमन्त्रीको फोन अफ भएको गुनासो पनि पोखेका छन् । उनले लेखेका छन्, ‘जनकपुरमा लफडा गृहमन्त्रीको फोन अफ !’।
