काठमान्डौ : भोटेकोशी नदीमा आएको विनाशकारी बाढीबाट प्रभावित नुवाकोटका करिब ५ सय घरपरिवारलाई गैरआवासीय नेपाली संघ (एनआरएनए) ले ५० लाख रुपैयाँ बराबरको राहत सामग्री वितरण गरेको छ ।
एनआरएनए अध्यक्ष डा. हेमराज शर्मा, संस्थपाक अध्यक्ष उपेन्द्र महत,प्रमुख संरक्षक डा.बद्री केसीसहितको टोलीले प्रभावित क्षेत्रको स्थलगत निरीक्षण गर्दै जिल्ला प्रशासन, विपद् व्यवस्थापन समिति, नेपाली सेना तथा स्थानीय तहसँग समन्वय गरी राहत वितरण गरेको हो ।
राहतअन्तर्गत ५ सय घर परिवार लाई पुग्ने: ५ सय थान त्रिपाल,५ सय थान म्याट,५ सय थान सोलार लाइट, ५ सय बक्स खाद्दन, ५ सय थान लत्ता कपडा बक्स,लगायतका अत्यावश्यक सामग्री वितरण गरिएको छ।
टोलिले नुवाकोट वैकल्पिक आयुर्वेदिक औषधालय तथा विदुर–५ स्थित आश्रयस्थलमा रहेका प्रभावित नागरिक, विशेषगरी वृद्धवृद्धालाई प्रत्यक्ष राहत वितरण गरेको थियो । त्यस्तै, पिपलटार स्थित चन्द्रज्योति माध्यमिक विद्यालयमा आश्रय लिएर बसेका बाढी प्रभावित परिवारलाई समेत राहत सामग्री उपलब्ध गराइएको छ ।
एनआरएनए उपाध्यक्ष तथा विपद् व्यवस्थापन संयोजक मनोज गोर्खालीले संघको धारणा राहत मात्रै होइन, पुनर्निर्माण सम्म साथ दिने रहेको बताए । ‘ प्रभावित नागरिकको आवश्यकता अनुसार एनआरएनए निरन्तर सहयोगमा रहनेछ,’ गोर्खालीले भने ।
