काठमाडौं । इरानमा आर्थिक संकट र मूल्यवृद्धिको विरोधमा १० दिनदेखि जारी विरोध प्रदर्शन बीच बिहीबार राति विभिन्न शहरमा सरकारविरुद्ध ठूलो प्रदर्शन भएको छ । अमेरिकी सञ्चारमाध्यम सीएनएनका अनुसार यो विरोध प्रदर्शन देशभरका १०० भन्दा बढी शहरहरूमा फैलिएको छ ।
प्रदर्शनकारीहरूले सडकहरू अवरुद्ध गरेका छन् भने आगजनी पनि गरेका छन् । इरानी सर्वोच्च नेता आयतोल्लाह अली खमेनीविरुद्ध प्रदर्शन जारी राखेका हुन् ।
अमेरिकी मानव अधिकार एजेन्सीका अनुसार प्रदर्शनका क्रममा भएको हिंसामा अहिलेसम्म ४५ जनाको मृत्यु भइसकेको छ, जसमा आठ बालबालिका पनि छन् । साथै, एक प्रहरी अधिकारीलाई छुरा प्रहार गरी हत्या गरिएको छ । अहिलेसम्म २ हजार २७० भन्दा बढीलाई हिरासतमा लिइएको छ ।
जारी प्रदर्शनकाबीच तेहरान विमानस्थल बन्द गर्नुका साथै देशभर इन्टरनेट र फोन सेवाहरू काटिएका छन् ।
