काठमाडौं । नेपाल इन्भेष्टमेन्ट मेगा बैंक लिमिटेड (एनआईएमबी) ले साना तथा मझौला व्यवसायी र उद्यमीलाई लक्षित गर्दै ५.७५ प्रतिशत ब्याजदरमा साना तथा मझौला (एसएमई) कर्जा योजना सार्वजनिक गरेको छ ।
बैंकका अनुसार योजनाअन्तर्गत ग्राहकले वार्षिक ५.७५ प्रतिशत ब्याजदरमा एसएमई कर्जा लिन सक्नेछन् । उक्त ब्याजदर एक वर्षसम्म स्थिर रहनेछ ।
‘मेहेनती हातलाई हाम्रो साथ’ भन्ने नारासहित ल्याइएको योजनामार्फत व्यवसायको प्रकृति, आवश्यकता, क्षमता तथा कर्जाको सदुपयोगिताका आधारमा उपयुक्त कर्जा सुविधा उपलब्ध गराइने बैंकले जनाएको हो । कर्जामार्फत व्यवसाय विस्तार, चालु पुँजी व्यवस्थापन, नयाँ लगानीलगायत व्यावसायिक आवश्यकता पूरा गर्न सकिने बैंकको भनाइ छ ।
एनआईएमबीले देशभर रहेका २५१ शाखामार्फत एसएमई कर्जासम्बन्धी सेवा तथा जानकारी प्रदान गर्दै आएको छ । बैंकले मेहनती व्यवसायी तथा उद्यमीसँग वित्तीय सहकार्य गर्दै उनीहरूको व्यवसायिक विकास र समृद्धिमा योगदान पुर्याउने विश्वास व्यक्त गरेको छ ।
