दुप्चेश्वर, नुवाकोट । जिल्ला प्रशासन कार्यालय नुवाकोटको आयोजनामा तथा दुप्चेश्वर गाउँपालिकाको समन्वयमा जिल्ला प्रशासन कार्यालयबाट प्रवाह हुने सेवासम्बन्धी अन्तरक्रिया तथा सार्वजनिक सुनुवाइ कार्यक्रम सम्पन्न भएको छ।
स्थानीय नागरिकलाई जिल्ला प्रशासन कार्यालयबाट उपलब्ध हुने सेवाबारे जानकारी गराउने, सेवाग्राहीका गुनासा तथा सुझाव संकलन गर्ने र सेवा प्रवाहलाई थप प्रभावकारी तथा नागरिकमैत्री बनाउने उद्देश्यले कार्यक्रम आयोजना गरिएको हो।
कार्यक्रममा जिल्ला प्रशासन कार्यालय नुवाकोटबाट प्रवाह हुने नागरिकता, राहदानी सिफारिस, राष्ट्रिय परिचयपत्र, शान्ति सुरक्षा, विपद् व्यवस्थापन, संघ–संस्था दर्ता तथा नवीकरणलगायतका सेवाबारे विस्तृत जानकारी प्रदान गरिएको थियो। साथै सेवाग्राहीहरूले भोग्दै आएका समस्या, चुनौती तथा सुधार गर्नुपर्ने पक्षबारे आफ्ना धारणा राखेका थिए।
सार्वजनिक सुनुवाइका क्रममा सहभागीहरूले दुर्गम क्षेत्रका नागरिकलाई सेवा प्राप्त गर्न भोग्नुपर्ने कठिनाइ, सेवा प्रवाहमा थप सहजता ल्याउनुपर्ने आवश्यकता तथा स्थानीय तहसँगको समन्वयलाई अझ प्रभावकारी बनाउनुपर्ने विषय उठाएका थिए।
जिल्ला प्रशासन कार्यालयका प्रतिनिधिहरूले उठाइएका जिज्ञासा, गुनासा तथा सुझावहरूको जवाफ दिँदै सेवा प्रवाहलाई अझ छिटो, पारदर्शी र नागरिकमैत्री बनाउन कार्यालय प्रतिबद्ध रहेको बताएका थिए। उनीहरूले सूचना प्रविधिको प्रयोगमार्फत सेवामा पहुँच विस्तार गर्न तथा सेवाग्राहीको सन्तुष्टि बढाउन विभिन्न सुधारका प्रयासहरू भइरहेको जानकारी दिए।
कार्यक्रममा दुप्चेश्वर गाउँपालिकाका जनप्रतिनिधि, विभिन्न सरकारी कार्यालयका प्रतिनिधि, सुरक्षाकर्मी, राजनीतिक दलका प्रतिनिधि, नागरिक समाज, पत्रकार तथा स्थानीय बासिन्दाहरूको सहभागिता रहेको थियो।
दुप्चेश्वर गाउँपालिकाका प्रतिनिधिहरूले स्थानीय तह र जिल्ला प्रशासन कार्यालयबीचको सहकार्यले नागरिकलाई प्रभावकारी सेवा प्रदान गर्न मद्दत पुग्ने विश्वास व्यक्त गर्दै यस्ता कार्यक्रमले जनताको आवाज सम्बन्धित निकायसम्म पुर्याउन महत्वपूर्ण भूमिका खेल्ने बताए।
कार्यक्रममा सहभागीहरूले सार्वजनिक सुनुवाइले सरकारी सेवाप्रतिको जनविश्वास अभिवृद्धि गर्नुका साथै सेवा प्रदायक र सेवाग्राहीबीचको दूरी घटाउन सहयोग पुगेको बताएका छन्।
नागरिकका गुनासा, सुझाव र अपेक्षालाई सम्बोधन गर्दै सेवा प्रवाहलाई थप प्रभावकारी बनाउने प्रतिबद्धतासहित कार्यक्रम सम्पन्न भएको आयोजकले जनाएको छ।
