१५ अंकले बढेर नेप्से सूचक २१ सयको विन्दुमा उक्लियो

  • प्रकाशित मिति : February 12, 2024
  • नयाँ सवाल

काठमाडौँ । सोमबार सेयर बजार परिसूचक नेप्से १५ अंकले बढ्दै २१ सयको विन्दुमा उक्लिएको छ । अघिल्लो दिन साढे १० अंकले घटेर २ हजार ८५.८२ अंकमा झरेको नेप्से सूचक दोस्रो दिन पुनः १५.३३ अंकले बढ्दै २१ सय १.१६ अंकमा उक्लिएको हो ।

तथापि, अघिल्लो दिनको तुलनामा कारोबार भने घटेको छ । नेपाल स्टक एक्सचेञ्जका अनुसार आज १५ अंकले नेप्से सूचक बढेको बजारमा ३ अर्ब ५८ करोड ६९ लाख रुपैयाँ बराबरको सेयर कारोबार भएको छ । अघिल्लो दिन १० अंकले नेप्से घटेको बजारमा ४ अर्ब ८ करोड ५६ लाख रुपैयाँ बराबरको सेयर कारोबार भएको थियो ।

आज पनि उच्च कारोबार हुनेको शीर्ष स्थानमा हिमालयन रिइन्स्योरेन्स नै रहेको छ । कम्पनीको २३ करोड २ लाख ३५ हजार रुपैयाँ बराबरको सेयर आज दोस्रो बजारमा कारोबार भएको छ ।

यस्तै, एनआरएन इन्फ्रास्ट्रक्चर एण्ड डेभलपमेन्ट लिमिटेडको १६ करोड ३० लाख २५ हजार रुपैयाँ बराबरको सेयर कारोबार हुँदा यता एनआईसी एशिया बैंक लिमिटेडको १३ करोड ७७ लाख ४७ हजार रुपैयाँ बराबरको सेयर कारोबार भएको छ ।

आज अन्य समूहको उपसूचक झिनो (०.०५ प्रतिशत) ले घट्नु बाहेक अरु १२ वटा उपसूचक धनातमक भएका छन् । सबैभन्दा बढी म्यानु एण्ड प्रो समूहको उपसूचक आज २.२२ प्रतिशतले बढेको छ ।