काठमाडौं । एनएमबी बैंकले भोटेकोशी नदीमा आएको विनाशकारी बाढीबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा ३ करोड ५१ लाख रुपैयाँ सहयोग गरेको छ।
बैंकका सञ्चालक समितिका अध्यक्षले उक्त रकमको चेक अर्थमन्त्रीलाई औपचारिक रूपमा हस्तान्तरण गरेका हुन्। आर्थिक सहयोगसँगै बैंकले बाढी प्रभावित नागरिकका लागि १० लाख रुपैयाँ बराबरको अत्यावश्यक राहत सामग्री समेत उपलब्ध गराएको जनाएको छ।
भोटेकोशी नदीमा आएको अचानक र भीषण बाढीका कारण ठूलो जनधनको क्षति भएको छ। बाढीबाट रसुवा, नुवाकोट, धादिङ, गोरखा र चितवनलगायतका जिल्लाका नदी आसपासका क्षेत्र प्रभावित भएका छन्।
विपद्बाट प्रभावित नागरिकलाई तत्काल राहत तथा सहयोग उपलब्ध गराउने उद्देश्यले बैंकले आर्थिक सहयोगसँगै आवश्यक राहत सामग्रीसमेत उपलब्ध गराएको हो।
