दुप्चेश्वर, नुवाकोट । दुप्चेश्वर गाउँपालिका र सहकार्य समाज नेपालको संयुक्त आयोजनामा दुप्चेश्वर गाउँपालिका वडा नं. ७ मा चार दिने साना होटल तथा लज व्यवस्थापन तालिम कार्यक्रम सम्पन्न भएको छ।
स्थानीय पर्यटन प्रवर्द्धन, आतिथ्य सेवा सुधार तथा स्वरोजगारका अवसर सिर्जना गर्ने उद्देश्यले सञ्चालन गरिएको तालिममा होटल तथा लज व्यवसायमा संलग्न व्यवसायी, उद्यमी तथा पर्यटन क्षेत्रमा रुचि राख्ने स्थानीय सहभागीहरूको उत्साहजनक सहभागिता रहेको थियो।
तालिमका क्रममा होटल तथा लज सञ्चालनका आधारभूत सिद्धान्त, ग्राहक सेवा व्यवस्थापन, सरसफाइ तथा खाद्य स्वच्छता, आतिथ्य कला, व्यवसाय व्यवस्थापन, लेखा तथा अभिलेख व्यवस्थापन, बजार प्रवर्द्धन तथा पर्यटनमैत्री सेवा प्रवाहका विषयमा प्रशिक्षण प्रदान गरिएको थियो।
कार्यक्रमका प्रशिक्षकहरूले गुणस्तरीय सेवा, व्यवस्थित सञ्चालन र ग्राहक सन्तुष्टिमार्फत साना होटल तथा लज व्यवसायलाई दिगो र प्रतिस्पर्धी बनाउन सकिने बताएका थिए। तालिमले सहभागीहरूलाई व्यवसाय सञ्चालनमा आवश्यक व्यावहारिक ज्ञान र सीप प्रदान गरेको प्रशिक्षकहरूको भनाइ थियो।
समापन कार्यक्रममा बोल्दै गाउँपालिका प्रतिनिधिहरूले दुप्चेश्वर क्षेत्रको पर्यटन विकाससँगै स्थानीय होटल तथा लज व्यवसायको गुणस्तर अभिवृद्धि गर्न यस्ता तालिमहरू महत्वपूर्ण हुने बताए। उनीहरूले तालिमबाट प्राप्त ज्ञानलाई व्यवहारमा लागू गर्दै स्थानीय पर्यटन प्रवर्द्धनमा योगदान पुर्याउन सहभागीहरूलाई आग्रह गरे।
सहकार्य समाज नेपालका प्रतिनिधिहरूले स्थानीय समुदायको आर्थिक सशक्तीकरण र उद्यमशीलता विकासका लागि आगामी दिनमा पनि विभिन्न सीपमूलक तथा आयआर्जनमुखी कार्यक्रम सञ्चालन गरिने जानकारी दिए।
चार दिनसम्म सञ्चालन भएको तालिममा सहभागीहरूले होटल तथा लज व्यवस्थापनसम्बन्धी व्यावहारिक ज्ञान हासिल गरेको बताउँदै यस्ता कार्यक्रमले आफ्नो व्यवसायलाई थप व्यवस्थित र प्रभावकारी बनाउन सहयोग पुग्ने विश्वास व्यक्त गरेका छन्।
स्थानीय पर्यटन पूर्वाधार तथा सेवा क्षेत्रको विकासलाई टेवा पुर्याउने अपेक्षासहित कार्यक्रम सफलतापूर्वक सम्पन्न भएको आयोजकले जनाएको छ।
